January 15, 2008
Faryaad-e-Narasa
Jab tez-o-tund hawaaon ke jhakad chalte hain, jhonke afriyat ki maanind shehr ke gali koochon hatta ki kaseer-ul-manaazil imaaraton men cheekhte huye ghus padte hain, haadisaat ke khauf se bijli ki tarseel rok di jaati hai, aur saara shehr gehre andhere men gharq ho jaata hai…..
Tab dam todti urdu ki karaahen mujhe saaf sunaai deti hain, main apne kaan us ke larazte labon ke qareeb le jaata hun to paata hun ki ukhadti saanson ke saath woh kuchh kehna chaahti hai. kuchh toote phoote berabt-o-namukammal jumle hain…..
…..mujhe bacha lo, main tumhaare aaba-wa-ajdaad ki meeraas hun, yeh mujh par ajnabi zabaanon men tabsere kiyun karte hain, agar inhen filhaqeeqat mujh se lagaao hai to mere wajood-o-baqa ke liye mera hi istemaal kiyun nahin karte. kya main jazbaat ke izhaar ke liye nakaafi hun, jo ghair zabaanon mein mere bachaao ki tarkeeben ki ja rahi hain…..
Socha to ki laao keh dun ki inhen urdu adab aur uski baqa se koi lena dena nahin hai balki sher-o-shaairi aur urdu men maujood tafreehi adab se gharaz hai. par aakhiri hichkiyaan leti urdu ko ek aur sadma pahunchaane ki himmat nahin hui.
–
Sawood Alam
January 14, 2008
Ibteda!
Sard raat ki siyahi mein, ek be-barg-o-baar khushk tehni par mutafakkir baithe; tezi se badalte siyasi haalaat, tez-o-tund takneeki aandhi, computer aur internet ke sood-o-ziyaan, awaam mein badhti bechaini, moaashre ki beraahravi, pasmaandah tabqe ki bechaargi, hukkaam ki behisi, nawjawaanon ki lamaqsadiyat, rishwatkhori, soodi nizaam, haraamkaari, ladeeniyat, jinsi bulhawasi, makr-o-fareb, aalami fasaad, iffat ki pamaali, mauroosi aqdaar ki naqadri waghairah jaise beshumaar mauzooaat mein mustaghraq ullu ki tarha udaas baitha soch raha hun ki is blog ke pehle murasile mein kya kya likhun?
–
Sawood Alam
